Sevdiyiniz şeylərdən (haqq yolunda) sərf etməyincə fəzilət məqamına çata bilməzsiniz! {“Ali İmran” surəsi, 3/92}

Ey iman gətirənlər! Qazandığınız və sizin üçün torpaqdan yetişdirdiyimiz şeylərin (ən pak, halal və) yaxşılarından (Allah yolunda) sərf edin! Özünüzə verildiyi təqdirdə ancaq göz yumub alacağınız pis şeylərdən xərcləməyə çalışmayın.! {“Bəqərə” surəsi, 2/267}

Hz. Ənəs (r.a.) rəvayət edir:

“Mədinədə ənsar arasında ən böyük xurma bağı Əbu Talhada idi. O, mal-dövlətinin içində ən çox Məscidül-Nəbəvinin qarşısında yerləşən Bəyruhə adlı xurma bağını xoşlayırdı. Allah Rəsulu (s.ə.s.) bu bağa gələr və orada çıxan şirin sudan içərdi. Əbu Talha “Sevdiyiniz şeylərdən (haqq yolunda) sərf etməyincə fəzilət məqamına çata bilməzsiniz!” ayəsi nazil olanda Allah Rəsulunun (s.ə.s.) hüzuruna gəlib: “Ya Rəsulallah! Allah-Təala Sənə “Sevdiyiniz şeylərdən (haqq yolunda) sərf etməyincə fəzilət məqamına çata bilməzsiniz!” ayəsini nazil etdi. Sərvətim içində ən çox Bəyruhə bağını xoşlayıram. Onu Allah yolunda verirəm və ümid edirəm ki, Allah onu mənim üçün savab vəsiləsi və axirət neməti edəcək. Bəyruhədən Allahın buyurduğu şəkildə istifadə et,” – dedi. Bundan sonra Allah Rəsulu (s.ə.s.) belə buyurdu: “Afərin sənə. Qazanclı ticarət məhz budur. Sənin səmimiyyətini gördüm və sözlərini eşitdim, Əbu Talha. Amma məncə, onu qohumlara vermək daha uyğundur”. Əbu Talha: “Sən necə buyurursansa, elə olsun, ey Allahın Rəsulu!” – dedi və bağı yaxın qohumları ilə əmioğulları arasında bölüşdürdü”. [Buxari, Zəkat 44; Müslim, Zəkat 42]